«استانا» كومانداسىنىڭ قورعاۋشىسى يۋري لوگۆينەنكو «ۆيلياررەالعا» قارسى ويىن جايلى پىكىر ءبىلدىردى.
– ەرتەڭگى ويىنعا ساقاداي ساي تۇرمىز. جاتتىعۋلاردىڭ ءبارىن جوسپار بويىنشا ورىندادىق. «ۆيلررەال» - شابۋىلعا كوڭىل بولەتىن ەۋروپاداعى مىقتى كوماندالاردىڭ ءبىرى. ويىندارى نەگىزىنەن قىسقا ءارى جىلدام پاس ارقىلى ءوربيدى.
– قازاقستانداعى بىرقاتار جۋرناليستەر, ساراپشىلار «استانانىڭ» ەۋروپا ليگاسىندا ونەر كورسەتكەنىن قۇپ كورەدى...
– ارينە, كىم دە بولسىن دەڭگەيى جوعارى تۋرنيرگە قاتىسقاندى قالايدى. بىراق ءبىز ەۋروپا ليگاسىنىڭ توپتىق كەزەڭىنە تۇسكەن بولساق, دەمەك دەڭگەيىمىز وسىعان ساي دەگەندى بىلدىرەدى. «استانا» جىل سايىن كۇشەيىپ كەلەدى, سايكەسىنشە, جوعارى ناتيجەلەرگە قول جەتكىزۋدى كوزدەيمىز. ەرتەڭگى ويىندا قاجەتتى ناتيجەگە قول جەتكىزۋ ءۇشىن بارىمىزدى سالاتىن بولامىز.
– ءسىزدىڭ ويىڭىزشا, «ۆيلياررەالدان» قانداي قاۋىپ كۇتۋگە بولادى؟ ال ءوز كەزەگىندە «استانا» قانداي فۋتبول كورسەتپەك؟
– «ۆيلياررەال» ءوز الاڭىندا ويناعاندىقتان, شابۋىلعا باسا ءمان بەرەدى دەپ ويلايمىن. ال ءبىز جۇمىلعان جۇدىرىقتاي بولۋىمىز كەرەك. باپكەرىمىزدىڭ نۇسقاۋىن تولىعىمەن ورىنداپ, قاجەتتى ناتيجەگە جەتۋگە تىرىسامىز.
– يسپانيالىقتاردىڭ ساپىنان قاي ويىنشى سىزگە كوبىرەك قيىندىق تۋدىرادى دەپ ويلايسىز؟ قاي فۋتبولشىنىڭ ويىنىن ەرەكشە اتاپ وتەر ەدىڭىز؟
– ءوز باسىم ناقتى مىنا ويىنشى مىقتى دەپ اتاعاندى ءجون كورمەيمىن. بىراق «ۆيلياررەالدىڭ» وڭاي قارسىلاس ەمەس ەكەنىن جاقسى بىلەمىن. قانداي جاعداي بولماسىن ماتچ ءبىز ءۇشىن جاقسى اياقتالادى دەپ ۇمىتتەنەمىن.
– ءتورت جىل بۇرىن «استانا» «ۆيلياررەالعا» قارسى ويناعان بولاتىن. ءبىز ەلوردالىقتاردىڭ وسى ۋاقىت ارالىعىندا دامىپ جاتقانىن بايقاپ وتىرمىز. ال ءسىزدىڭ پىكىرىڭىز قانداي؟
– ءتورت جىل بۇرىن «استانادا» ويناماعان ەدىم. سوندىقتان ول كەزەڭدەگى ويىندارعا پىكىر ءبىلدىرۋىم قيىنداۋ. بىراق «استانانىڭ» جىل سايىن دامىپ جاتقانىنا سەنىمدىمىن.
ايان ءابدۋالي, «ەگەمەن قازاقستان»